كيف اكون سعيد؟

​بعطيك مجموعة اشياء اذا طبقتها بحياتك اضمن لك انك ان شاء الله بتكون سعيد 

اول شيء تسويه عشان تكون سعيد انك توقف الشكوى بجميع انواعها وبدال ما تركز على النعم المسلوبه منك تركز على النعم الموجوده عندك 

ثاني شيء تسويه عشان تكون سعيد هو انك تشكر ربي على النعم الي عندك (لئِن شكرتم لأزيدنكم)سورة ابراهيم:٧ يعني اول ما تقوم الصبح احمد الله انه اعطاك يوم جديد تعيشه واحمد الله ان عندك اكل تاكله وماء تشربها وهكذا خل صباحك مليان بشكر والحمد

ثالث شيء تسويه عشان تكون سعيد هو انك تطلع من دور الضحيه خلاص ما مليت صار لك سنين تلعب دور الضحيه هل تغير شيء بحياتك هل تحسن شيء بحياتك ؟ خلاص قم و عدل حياتك ولا تجلس تقول لو صار كذا وليش انا كذا وليش حياتي كذا وليش انا الوحيد الي اعاني وليش انا خزان احزان والكثير من الحلطمه الي لا تسمن ولا تغني من جوع و اختصر عليك لو تبحث منا لي اخر يوم بعمرك عن اجابة على اسألتك هذي منتب لاقي لها اجابات لان هذا قدرك هذا الي كتبه الله عليك لحكمه هو يعلمها بدال ما تصيح وتنوح تقبل ان هذي دار ابتلاء وابدأ اسعى وحسن من حياتك بالمتاح الي عندك 

الشيء الرابع الي لازم تقتنع فيه عشان تكون سعيد هو انه مافيه شيء كامل بهذي الدنيا كل شخص فيه عيب الوظيفه الجديده الي قبلوك فيها موجود فيها عيوب الشخص الي ناوي تتزوجه فيه عيوب انت بكبرك فيك عيوب هذي حقيقه مطلقه صح الانسان يحاول يحسن من نفسه ومن معيشته بس لازم تتقبل حقيقة النقص عشان تقدر ترضا وتنسجم مع الي حولك لان اذا كنت متوقع منهم و من نفسك الكمال بتكون دايم في حالة حرب مع نفسك ومعهم ولا راح تقدر تكون راضي ومطمئن البال

الشيء الخامس الي لازم تسويه عشان تكون سعيد هو انك تحافظ على خصوصياتك لا تشارك وش اهدافك ولا وش بتسوي ولا رؤيتك بالحياه هذي الاشياء كلها اول ما تشاركها مع الناس تخرب لاتقولها لأحد واشتغل عليها بصمت عشان تقدر تنجز

الشيء السادس الي تسويه عشان تكون سعيد هو انك تهتم بنفسك من ناحية نفسيه وجسديه ودينيه وصحيه وكل شيء يخصك لا تنتظر من احد انه يهتم فيك انت الي اهتم بنفسك

الشيء السابع الي لازم تتجنبه عشان تكون سعيد هو انك ما تكون فاضي ولا عندك لا شغل ولا مشغله  ولا تعرف وش بتسوي اليوم وعايش سبهلله تنام بأي وقت وتصحى بأي وقت ولا عندك شيء تنجزه حتى لو ما كان عندك وظيفه خل عندك روتين بسيط هذا يحمي نفسيتك بإذن الله لين تحصل وظيفه 

الشيء الثامن الي بيخليك سعيد لا تتوقع شيء من الناس لا تقول انا كنت متحزم فيهم  ومتوقع منهم اذا طحت بالمصيبه الفلانيه يساعدوني هذا كله توقعات منك انت هم ما قالوا شيء انت الي قلت وانت الي توقعت عشان كذا تحمل خيبة الامل الي بتجيك لا تتوقع شيء من احد ولا تنتظر شيء من احد اذا تبي شيء جبه بيمناك واختم بهذا الاقتباس " السعادة ليست محطة وصول ننتظر بلوغها بل هي طريق نختاره بأنفسنا"

شكرًا لحسن قراءتكم